පෙලිකන් කුරුල්ලෝ....

වසන්තේ ඇවිදින් ආයෙම

මග දෙපස වසාගෙන

පාට කොඩි ලෙළදෙන..

ගස් ගල් තාප්ප බිත්ති පුරා

හිනාවෙන මුහුණු එක රැයින් මතුවෙන..

මංසන්ධි අහුරගෙන

ඔල්වරන් ප්‍රීති ඝෝෂා මැද

ලවුස්පීකර් කතා වෑහෙන..

ගම්මානෙ කෙළවර

අලුත් වී ඇත පැරණි වැව

ජපන් ජබර සැල්වීනියා පිස

රැළි නඟා පල් වතුර

කවුරුන් හෝ මෙතැනට

කොහෙන් හෝ ගෙනවිත් දැමුව

පෙලිකන් කුරුල්ලන් රෑනකි

පිහිනා යන වැව් දිය මත..

සලයි උන් කිලිටි අත්තටු

වැවේ මඩ පාටටම සැසඳෙන

වක ගැසුණු හොටයෙන්

පීරමින් වැව් දිය

සොයයි තිත්තයන් කොරළින්

ගොදුරට..

පිරුණු පසු කුස

රැස්වෙති උන් පාට කොඩි හෙවණට

අලසව වැතිරී බිම

අඩවන් බොරපැහැති දෑසින්

බලාගෙන හිඳියි දුර ඈතක

ගිණි අව්ව වැසි සුළං මැද

ගලායන මිනිස් ගඟ දෙස..