අහස්කූර

පොළවට බොහෝ දුර බව

හිතෙන්නැති සමහරවිට

තරුවක් ලඟටම ගොසින්

නිවුණු පසු අහස්කූරට...

නිහඬ විල

ඉඳහිට පත්‍රයක් දෙකක් අතහැර

ඇඳෙන වියැකෙන රළ දෙස බලා හිඳ

තනිවම කල්පනා කරයි ගස

"ඇයි මේ තරම් නිහඬ මේ විල"

පළඟැටියෙක්...

අඳුරින් වැසෙයි මඟ..

යන්තමින් දැල්වෙයි

මොටෝරථයක එළි හිස..

පළඟැටියෙක්

පියාඹයි ඒ දෙස

ඉටිපන්දමක් අතහැර...

කුඩා තෘණ පඳුරු

ඉතා උස තුරු මුදුන්

සිප ගත් පසුයි පළමුව

වැළඳගන්නේ වැහි බින්දු

නොමැතිව කිසිදු වෙනසක්

අඩු නොවී සෙනෙහෙ බිඳකුත්

මේ කුඩා කුඩා තෘණ පඳුරු..

සිනාසෙන විට ඔබ...

සිනාසෙන විට ඔබ

මඳක් වැඩෙයෙන් ඇසෙයි හඬ..

යම් කුඩා දිලිසුමක්

මතුව ඒ ඇස් අග..

මනා සේ හැඩකොට

පීරා තිබේ කෙස් කළඹද..

සුදු පැහැති මුදු මලක්

රැඳවී තිබේ 

බැස යන සැඳෑ හිරුගේ

වර්ණයෙන් ඔපනැංවූ වරලස..

කුමක් හෝ යමක්

සිදුවී තිබේ අද...

මල් පිපෙන හීන

කාට හෝ උණුසුම පිණිස

ගිනිගෙන දැවෙද්දිත් මුළු සිරුර

මේ ඉපල් අතු ඉති තවම

දකින හැටි මල් පිපෙන හීන.

නුඹෙ කවි

මිතුර නුඹෙ කවි

ඔපදැමූ කැඩපත් මෙනි

පෙන්වාදෙන මට මා යලි..

දකිමි ඒ කවි තුළ මම ද

මා තුළ වෙසෙන තව බොහෝ අය ද..

ඔබ වෙත එවූ කවි

සිහිල් පවනක ඔතා

ඔබ වෙත එවූ කවි

ඔබද පසු කරන්

ඈත යන හැටි..

ඔබ - මම

ඔබ වියළි කතරක්

මම 

බඳුන්ගත පතොක් පඳුරක්

පළඟැටි ගීතයත් රිදුමක්

සැඩ වැහි අකුණුවලින්

පහර ලැබු පසු පොළවකට

පළඟැටි ගීතයත් රිදුමක්

හමු(නො)වීම

අවසන 

අපි වෙන්ව ගිය බව

ඔබ කියන විටදි

කිසිදාක

අපිට අපි

හමුවුණේවත් නැති වග

මම තනිව සිතමි...

එකම හිස් අසුන

කොයිතරම් නපුරුද

බස් රථයෙහි

ඔබේ පසෙකින් ඉඩ තබන

එකම හිස් අසුන.

කොයිතරම් දරුණුද

විලවුන් සුවඳ ගෙන

දස අත හමන සුළඟ.

කොයිතරම් වැරදිකාරද

මේ වැනි මොහොතක

වික්ටර් ගෙ ප්‍රේමගීයක් ගයන

රේඩියෝව..

කුහුඹු පෙම

අතු පතර විහිද ගිය

දහසකුත් පත් දරන

ඔබ විසල් තුර..

එක කුඩා තුරු පතක

ලෝකයක් ගොඩ නගන

මගෙ කුහුඹු පෙම.

මම කුඩා නගරයක්..

මම

කුඩා නගරයක්

පටු වීදි කිහිපයකින් සැදි

සියලු දේ බෙදා නම්කොට තිබෙන..

ඔබ

මහද්වීපයක්

අනන්තය තෙක් විහිදෙන 

අසීමිත භූවිෂමතා ලක්ෂණ දරන

පය තැබූ කල

අතරමං වීමට සිතෙන..

ගස් විඳ දරා ගත යුතු

වසාගෙන ඉති අතු

පුබුදුවා දහසකුත් මල් රතු

පැමිණ යළි නික්ම යාමයි

කාරිය වසන්තය සතු.

පැමිණී ගියත් කොයි තරම් ඍතු

පිස දමා බොඳවෙන නෙතු

ගස් සම සිතින් විඳ දරා ගත යුතු.

උඳුපියලි

පය තබන පොළවේ

පෑගෙන.

ළංව බැලුවොත් මිස

නොපෙනෙන..

ආසා නැතිද

මේ උඳුපියලි පතකට

වැඩෙන්න ඉහළට

මෘදු හාදු අතුරන්නට

සුළං නළලත..

උදෑසන 

පිනි බිංදු වැළඳ ගෙන

ලබන්නෙද 

සැනසුම.

මීදුම් ඉසව්ව

ලස්සන යැයි ඔබ පෙන්නුව

මීදුම් ඉසව්වට

හිරු එළිය වැටී ඇත

හමන සුළඟට

මීදුම පහවගොස් ඇත

දැන් පෙනේ හොඳහැටි

පතුල නැති ප්‍රපාතය.

සයුර සහ රළ

අතින් අත අල්ලගෙන

කිසිම දවසක

නැවතුනේ නැතත් ළඟින්

එක මොහොතකට..

කිරි කවඩි මුතු පබළු අහුරක්

වෙරළ දෝතට

තබා යනවාමයි

සයුරු රළ...

තරු පොකුර

සිහින් එළි බිඳු බිඳු පෙරා දී වළාකුළු අතර

දුරින් උන්නද මුළු රැය පුරා අහසේම වැතිර

අතින් පිස දැමුව පසු මඟ කියු තරු පොකුර

ඉමක් නොපෙනෙන හිස් ඉඩකි වැලි කතර

ප්‍රදීපාගාරයෙ ඇස

මඟ ලකුණු හොයාගෙන

ආවත් ගොඩබිමට නැව

එළිය අඩුවක් නැත

ප්‍රදීපාගාරයෙ ඇස.