A hidden life (2019)

"සමිඳාණෝ මා එඬේරාණෝ ය; අග හිඟ මට නොවන්නේ ය. එතුමාණෝ නිල් තණ බිම් මත මා සතප්වා, නිසල දිය වෙත පමුණුවා, මා පණගන්වන සේක. සිය නාමයේ මහිමය සැලසෙන ලෙස දමිටු මඟ මා ගෙන යන සේක. මරණය වැනි ගන’ඳුරු රුදුරු නිම්නය මැදින් ගියත්, ඔබ මා සමඟ බැවින්, මට කිසි බියක් නොවන්නේ ය."

(ගීතාවලිය 23: 1 - 4)

.

.

ඉතිහාසය නමැති පොතේ පිටු බොහෝ වෙලාවට පිරවෙන්නෙ ජයග්‍රාහකයන් ගේ නම්වලින්. නැත්නම් මහා ඛේදවාචක වලින්. දීර්ඝ කාලීන අඳුරු පරිච්ඡේදය වලින්. නමුත් මේ අඳුර ඇතුළේ තමන් විශ්වාස කරන ආලෝකය තුළම පැවතුණු, නපුරින් මුළු සමාජය වැහිල යද්දි යහපත් බවේ මුල් සිඳනොගත්තු කුඩා කුඩා තනි මිනිස් ජීවිත මේ ඉතිහාස පොතේ කතුවරුන්ට කවදාකවත් විෂය වුණේ නැහැ. ඒ ආලෝකයේ ජීවිත ගැන කොතැනකවත් මහාපරිමාණයෙන් සඳහනක් වෙන්නෙ නෑ. අද අපි අතරෙ යම් යහපත් කමක් ගැන අදහසක් රැඳිල තියනව නම් ඒ තමන්ගේ ජීවිතය කැපකරල ඒ යහපත වෙනුවෙන් පෙනීහිටි කුඩා හෝ මිනිස් සමූහයක් නිසාම බව අපිට බොහෝ වෙලාවට අමතකයි. සිනමාවේ ඇමරිකානු කවියා වෙන Terrence Malic තමන්ගේ A hidden life චිත්‍රපටයෙන් කරන්නෙ ඒ සැඟවුණු ජීවිත සොයාගෙන ගිහින් අනාවරණය කිරීමේ සුවිශේෂ කාර්‍ය.

දෙවන ලෝක යුද්ධය කියන්නෙ මෙන්න මේවගේ මිනිස් ඉතිහාසයේ ලියවුණු එක් අඳුරුතම සිදුවීම් මාලාවක්. විශේෂයෙන් යුරෝපයේ එය ලෙයින් නැහැවී ගිය කාල වකවානුවක්. Shindlers list වගේ මේ සිදුවීම් මුල්කරගෙන නිමැවුණු චිත්‍රපට නරඹා ඇත්නම් නාසිවාදී හමුදාව කොයිතරම් සැහැල්ලුවෙන් අහිංසක මිනිස්සුන් සමූහ වශයෙන් මරා දැම්මද, මිනිස් ජීවිතයක වටිනාකම කොයිතරම් හැල්ලුවට ලක්වුණාද කියන කාරණය දැක්ගන්න ලැබේවි. මේ සමයේදි ජර්මන් ඒකාධිපති හි'ලර් තමන්ගේ රටෙන් සහ තමාට හිතවාදි අනෙක් යුරෝපියානු රටවලින් නාසි හමුදාවට සෙබලුන් එක්රැස් කරන්න පටන්ගෙන තිබුණා. හමුදා සෙබලුන් තෝරාගත්තෙ සාමාන්‍ය ජනතාව අතරින්මයි. ටික දෙනෙක් පමණක් මේ යුද්ධයට තමන්ට දායක විය නොහැකි බව කියමින් මේ කැඳවීමට පිටුපෑව. A hidden life ඒ ආකාරයට නොමිනිස් යුද්ධයකට සහභාගි වීම ප්‍රතික්ෂේප කළ මිනිසෙකුගේ කතාවක්.

 ෆ්‍රාන්ස් සහ ඔහුගේ බිරිඳ ෆ්‍රාන්සෙස්කා ඔස්ට්‍රියාවේ ඇල්ප්ස් කඳුකරය පසුබිම් කරගත් ගමක ගොවිතැන් කරමින් ජීවිතේ ගත කළ සාමාන්‍ය යුවළක්. ඔවුන් අවට තිබෙන මේ කඳුකර පරිසරයත් ඉතාම සුන්දර එකක්. දෙදෙනාගේ ජීවිත ගතවුණේත් ඒ වගේම සුන්දරව ආදරයෙන් පිරී ඉතිරී යමින්. පහුකාලීනව දියණියන් තුන්දෙනෙක්ම මේ ආදරණීය පුංචි පවුලට එකතු වෙනව. දෙවනි ලෝක යුද්ධය ආරම්භ වෙන්නෙ ඔය අතර. ෆ්‍රාන්ස්ට අනිවාර්ය යුධ පුහුණුවකට ජර්මන් හමුදාවෙන් කැඳවීමක් ලැබෙනව. ටික කලකට හරි පවුලෙන් වෙන්වීම දුකක් වුණත් ඒ දුක ඉවසාගෙන ෆ්‍රාන්ස් මාස කිහිපයක් යුධ පුහුණුවට පිටත් වෙනව. අපසු ගමට එන ෆ්‍රාන්ස්ට දෙවනි වර කැඳවිම ලැබෙන්නෙ හමුදාසේවයට එක්වෙන්න නියම කරමින්. නමුත් මෙය බාරගන්න ෆ්‍රාන්ස් සූදානම් නැහැ. ඔහු භක්තිමත් කිතුණුවෙක්. අහිංසක මිනිසුන් මරා දමමින් ගෙනයන යුද්ධයකට දායක වෙනව කියන්නෙ ඔහුට අනුව තමන් විශ්වාස කරන වටිනාකම් වලට එරෙහිව යාමක්. මිනීමැරු ආඥාදායකයෙක් වෙනුවෙන් පෙනී සිටීම, ඔහු තම නායකයා විදිහට පිලිගැනීම ඔහුට කිසිසේත්ම කළ නොහැක්කක්. තමන්ගේ ආත්මය පාවාදෙමින් නාසි හමුදාවට එක්වීම ප්‍රතික්ෂේප කරන ඔහුට මොකක්ද වෙන්නෙ?

මෙතනදි ෆ්‍රාන්ස්ටත් ඔහුගෙ බිරිඳ වගේම දරුවන්ටත් සමාජයෙන් එල්ලවෙන පීඩනය බොහෝම තදබල එකක්. දහස් ගණනක් මිනිස්සු ජීවිතය පරදුවට තබල රටවෙනුවෙන් යුදවදින්න පිටවී යන අතරෙ ෆ්‍රාන්ස් එය නොකිරීම බයගුළු කමක් විදිහටයි ඔවුන් හඳුන්වන්නෙ. උපන් රටට ණයගැති දේශද්‍රෝහින් විදිහට හංවඩු ගැහෙන ෆ්‍රාන්ස්ටත් ඔහුගෙ පවුලටත් සිදුවෙන්නෙ ගමේ මිනිස්සුන්ගෙන් නොයෙක් හිරිහැර, අපහාස, උපහාස වලට ලක්වෙන්න. තමන් මැදිවෙලා ඉන්න මේ ගැටලුවට විසඳුමක් පතාගෙන ෆ්‍රාන්ස් යන්නෙ පල්ලියට. නමුත් එතනදිත් ඔහුට සහනයක් ලැබෙන්නෙ නැහැ. පල්ලිය පවා තියෙන්නෙ දේශපාලකයන්ගෙ බලයට අභියෝග නොකරන පසුගාමී තැනක. භක්තිමත් කිතුණුවෙක් සහ කිතුණු දහමේ වටිනාකම් බොහෝම තදින් තමන්ගේ ජීවිතේ පවත්වාගන්නා මිනිසෙක් වුණු ෆ්‍රාන්ස් මෙතනදි පත්වෙන අසරණ භාවය ගැන අමුතුවෙන් විස්තර කරන්න අවශ්‍ය නැහැ. මොන දේ වුණත් තමන් ගත් තීරණයේ නොසැලී ඉන්න ඔහු තීරණය කරන්නෙ මෙවැනි තත්ත්වයක් යටතෙ. 

A hidden life පැය තුනකට ආසන්න ධාවන කාලයක් තියන සහ බොහෝම ඉවසිලිවන්ත ව නරඹන්න ඕන සිනමාපටයක් බව කියන්නම්. කඳුවැටි, තැනිතලාබිම්, ගොවිපළ සත්තු, සීසෑම්, තණකොළ කැපීම්, මෙවැනි දර්ශන අධ්‍යක්ෂවරයා ඉතාම සංකේතාත්මකව චිත්‍රපටය ඇතුළෙ භාවිත කරල තියනව. Terrence Malic ගේ සිනමා භාෂාව මේවගේ සාහිත්‍යමය ගුණයෙන් පිරුණු එකක්. රූප සෞන්දර්ය උතුරායන දර්ශන තල,  භාවනාත්මකම විඳගතයුතු මන්දගාමී බව, මේවා Terrence Malic ගේ සිනමා භාවිතාවේ අනන්‍ය ලක්ෂණ.  A hidden life ඒ සියළු ගුණාංගවලින් පොහොසත්. 

A hidden life චිත්‍රපටයෙ කියවෙන්නෙ සැබෑ ජීවිත කතාපුවතක්. Franz Jägerstätter ඔහු සැබැවින්ම මෙලොව ජීවත්වුණු මිනිසෙක්. වර්ගවාදයත්, මිනිසත්කමට එරෙහි ප්‍රචණ්ඩත්වයත් ප්‍රතික්ෂේප කළ තැනැත්තෙක්. ආයුධ අතටගත් ඕනෑම කෙනෙකුට වීරයෙක් වෙන්න පුලුවන්. නැත්නම් තමන් වීරයෙක් බව තමන්ටම හිතාගන්න පුලුවන්. නමුත් ලෝකයෙන් මොන බලපෑම එල්ලවුණත් තමන්ගේ හදවතට එකඟව ජීවත්වීම කියන්නෙ ඊට වඩා ටිකක් අමාරු වැඩක්. බොහෝ වෙලාවට ටික දෙනෙක් විතරක් ඇතුළුවෙන පටු දොරටුවක්. වීරත්වය කියන්නෙ අන්න ඒ යහපත් බවේ කුරුස ගමනට මිස වෙන යමක් නොවෙන බවයි මේ සැඟවුණු ජීවිත රහසේම අපිට කියාදෙන්නෙ.

A hidden life 

Directed by

Terrence Malick

Written by

Terrence Malick

Starring

August Diehl

Valerie Pachner

Matthias Schoenaerts

Cinematography

Jörg Widmer

Edited by

Rehman Nizar Ali

Joe Gleason

Sebastian Jones

Music by

James Newton Howard

I want to be a witch.

මට ඕන මායාකාරියක් වෙන්න

දිගම දිග කැත නහයක් තියන...

පුංචි උන් බයකරමින්

"එයා මහ නපුරියක්" කියමින්

නෙක කතන්දර ගොතනා

ලෝකයෙන් නොපෙනී යන්න...

කළු කබායක් දවටන්

ඉන්ද්‍රජාලික කොස්සේ නැගිලා

වළාකුල් වලට එපිටින් පියාඹා

හයියෙන් හිනාවෙන්න...

මහ නපුරු හැඩැති 

මගෙ පුංචි ගෙපැලේ ඉඳගෙන

නෙලාගෙන ඇවිත් වනයෙ ඵලවැල

රසකර කන්න...

අඳුරු වනපෙතේ ගැඹුරේ

කණමැදිරි මාළිගාවේ තනිවෙන්න..

දුර අහසෙ දිළිසෙන තරුවලට

මගෙ කඳුළු නොපෙන්නා ඉන්න...

කඳු මත්තෙ නැවතිලා

මුදුනතේ සනීපෙට නිදියන්න..

අරුමැසි කැලෑවෙන් එපිට

රෑ තිස්සෙ ඇවිදලා හොඳට

රොබින් කුරුලු පිහාටු ඇහිඳලා

වසන්ත කබායක් මහගන්න..

මගේ හැම රහසක්ම

ඒ ඇතුළෙ හංගන්න..

මට ඕන මායාකාරියක් වෙන්න

පොත්වල ඉන්නවා වගේ

බොහෝම නපුරුවට..හරි අමුතුවට...

ඉතිහාසයක අලුතෙන් ලියවෙන්න..

ඉන්ද්‍රජාලික පළිඟු බෝලයෙන්

ඔබේ රුව දැකගන්න..

මේ ලෝකෙ කොහේ හරි තැනක 

ඔබ හොඳින් බව දැනගන්න..

ඉන්පස්සෙ විලෝ ගහක් වගෙ වැලපෙන්න..

ගඟක් වගේ හැමදේම අමතක කර

ආයෙමත් ගලාගෙන යන්න..

මට ඕන අන්න එහෙම

මායාකාරියක් වෙන්න..

.

.

Translated from a poem written by Rochelle Fernando

The Red Dress

මම හැම වෙලාවකම හිතුවා

මම හැම වෙලාවකම කිව්වා

වයසින් වැඩිලා මම

නිදහස් කෙනෙකු වුණ දවසට

මං ළඟ තියේවි ගවුමක් 

රතුම රතු පාට..

කවරදාකවත් කිසිකෙනෙක්

නොදුටුව තරම් ලස්සන..

වසන්තයෙ දවස් ආවම

බොහෝම හිමින් සැනසිල්ලේ අපි

ඇවිදින්න යන ගමන්වලදී

ඇඳන් ආවකි ඒ ගවුම මට...

හිඳීවි කෙනෙක් අතරමඟ

මුළු ලෝකයක් අමතක කර

මා දිහා පමණක්ම බලන...

එඩිතර කෙනෙක් විය යුතුයි ඔහු

ඇස් ඇතුළෙ තාරකා දිළිසෙන,

හිරුරැස් වැටිලා හිස මත්තේ 

ඝන හිසකෙස් බබළන,

උණුහුම් තොල් පෙති අගින්

කිසිදාක බොරු වචන නොකියන....

මම සිහින මැව්වා අපි ගැන

ගමේම ඉන්න ලස්සනම හොඳම

ගෞරවාන්විතම යුවළ විදිහට..

වයසින් වැඩුණු ගැහැනියක් දැන් මම

ඔව් මං ළඟ තියනවා ඒ මෝඩ ගවුම...

.

.

.

Dorothy Parker ගේ පැදියක් ඇසුරින්

The Little Boy and the Old Man

"සමහර වෙලාවට

මම මගෙ හැන්ද වට්ටගන්නවා"

කිව්වා පුංචි ළමයා...

"මමත් එහෙම කරනවා"

කිව්වා වයසක මනුස්සයා...

"සමහර වෙලාවට

මම මගෙ කලිසම තෙමාගන්නවා".

රහසින් කෙඳිරුවා පුංචි ළමයා..

"මමත් එහෙම කරනවා"

හිනාවුණා වයසක මනුස්සයා...

"මම නිතරම අඬනවා"

කිව්වා පුංචි ළමයා...

"මමත් එහෙම කරනවා"

ඔලුව වැනුවා වයසක මනුස්සයා...

"නරකම දේ තමා"

කිව්වා පුංචි ළමයා..

"වැඩිහිටි අය කවුරුත්

මාව ගණනකට නොගන්න එක"

"තේරුම්ගන්න පුලුවන් මට

ඔයා කියන දෙය"

කිව්වා වයසක මනුස්සයා

ඒ පුංචි ළමයට...

.

.

.

Shel Silverstein ගේ පැදියක් අසුරෙන්..

Chungking express (1994)

"අපි හැම කෙනෙක්ම හැමවෙලාවෙම ආදරයෙදි එකවගේ වාසනාවන්ත වෙන්නෙ නැහැ. මට එහෙම වුණාම මම කරන්නෙ ඇවිදින්න යන එක. ශරීරයෙ තියන වතුර සෑහෙන ප්‍රමාණයක් දහදිය වෙලා පිටවෙලා යනව එතකොට. කඳුළු බවට හැරවෙන්න ටිකක් වත් ඉතුරු වෙන්නෙ නෑ"

- Chungking Express 

.

.

.

හැම ආදර කතාවක්ම සුවිශේෂ යි. ඊටම අනන්‍යයි. සමහර කතන්දර ටිකක් වැඩිපුර අනන්‍යයි. සමහරු ආදරේ නිසා කවදාවත් කෙනෙකුට හිතාගන්න බැරි දේවල් අනෙකා වෙනුවෙන් කරන්න පෙළඹෙනව. ආදරේ නිසා ආදරෙයි කියල වචනෙන් නොකියා අනෙකා වෙනුවෙන් නිහඬව තමන්ගේ ජීවිතේ කොටසක් කැප කරනව. හැබැයි ඒ අර සින්දුවක තියනව වගේ සඳ එළිය සේ පිවිතුරු ආදරයක් බව නම් කියන්න බැහැ. ඒක ඇතුළෙ තියනව තමන් ආදරය කරන කෙනා වෙනත් විරුද්ධ ලිංගිකයෙක් එක්ක ලඟින් ඉන්නකොට ඇතිවෙන සියුම් ඊර්ෂ්‍යාව. ඒ වෙනුවෙන් ඒක පාර්ශ්වීයව විඳවීම. නමුත් නිහඬවම ඉඳගෙන අනෙකාගෙ සතුට වෙනුවෙන් කරන පොඩි දේවල් සහ දේවල්වලින් අනික් මනුස්සය ලබන සතුට දිහා බලන් ඉඳීම තමා මේ ආදරයේ තියන සතුට. ඒ ප්‍රේම කතා සුවිශේෂ වෙන්නෙ මේ හැම දෙයක්ම නිසා.

Chunking express කියන්නෙ ඒ වගේ කතන්දර දෙකක්. හැබැයි මේ කතා එකිනෙකට සම්බන්ධ බවක් පේන්නෙ නෑ. Qiwu හොංකොං නගරෙ තරුණ පොලිස් නිළධාරියෙක්. 1994 අවුරුද්දේ හරියටම අප්‍රියෙල් 1 වෙනිදා මෝඩයන්ගෙ දිනයයි කියන දවසෙදි එයා ගෙ පෙම්වතී May එයාව අතහැර යනව. ඉන්පස්සෙ දිගින් දිගටම Qiwu කරන්නෙ May ට කතාකරන්න උත්සාහ කරන එක. ඒ හැම උත්සාහයක්ම අසාර්ථක වෙන තැන Qiwu තීරණය කරනව මැයි පලවෙනිද වෙනකම් හරියට මාසයක් May ට කතා කරන්න උත්සාහ කරන්න. එතකම් එයා වෙන කිසිම ගෑනුළමයෙක් දිහා බලන්නෙවත් නෑ කියල තමාටම එයා පොරොන්දු වෙනව. May ආසම කෑම හොයාගෙන ගිහින් ඒව කනබොන Qiwu ඈ ගැන හිතමින් උත්සාහය අතනොහැර මාසයක් ගත කරනව. ඒත් May ගෙන් කිසිම ප්‍රතිචාරයක් ලැබෙන්නෙ නෑ. අවසානෙ හිතේ දුක නිවාගන්න අවන්හලක මධුබඳුන් අතරේ වෙරිමතින් කාලය ගෙවාදමන Qiwu හිතනව අවන්හල් දොරෙන් එන මුල්ම ගැහැනියට තමන් ආදරය කරන්න පටන් ගන්න බව. ඒ පළමුවෙනි කතාව.

Qiwu නිතරම May ට  ඇමතුම් ගන්න දුරකතන කුටිය ලඟ කෙටි කෑම කඩයක් තියනව. Qiwu ගෙ මේ උත්සාහය කඩේ අයිතිකාර මනුස්සය හැමදාම බලාගෙන උන්නෙ. ඔන්න ඕක අතඇරල වෙන කෙනෙක් හොයාගන්න කියල එයා නිතර Qiwu ට උපදෙස් දුන්න. මේ කෑම කඩේට අලුතෙන් වැඩට එනව තවත් ගෑනුලමයෙක්. එයා Faye. එයා කොයිවෙලෙත් සද්දෙට සින්දු අහන හරි සැහැල්ලුවෙන් ඉන්න කෙනෙක් වගෙයි පේන්නෙ. කඩේ ගාවම රාජකාරි කරන අංක 663 තරුණ පොලිස් නිලධාරීයාව Faye ට දකින්න ලැබෙනව. Qiwu වගේම 663 ත් පරාජිත ප්‍රේමයක අමිහිරි මතක එක්ක කාලය ගතකරමින් එන්න කෙනෙක්. ඔහු හොඳ කඩවසම් තරුණයෙක්. Faye ට මේ පොලිස්කාර තරුණය ගැන පිළිබඳ හිතක් පහල වෙමින් තියෙන්නෙ. නමුත් ඈ ඒ බව කියන්නෙ නෑ. දවසක් අහම්බෙන් වගේ මේ තරුණයගෙ ගෙදර යතුරක් Faye ට හම්බ වෙනව. එතනින් මේ අප්‍රකාශිත ප්‍රේමය වෙනස්ම මානයකට පෙරළෙනව. ඔය දෙවනි කතාව. 

Faye තමා මේ කතාවෙ ඉන්න ආකර්ෂණීයම චරිතෙ. ඈ හරි අපූරු උණුහුම් දඟකාර චරිතයක්. ඈ තුළ පිරිලා තියෙන්නෙ මතක් වෙනකොටත් පපුව පිරිල යන ආදරණීය බවක්. මම හිතන්නෙ චිත්‍රපටය බලපු කෙනෙකුට නම් ඈ  අමතක නොවෙන කෙනෙක්.  Faye ගේ හැබෑ  ජීවිතේ නමත් මේ නමමයි. Faye හොංකොං වල සුප්‍රසිද්ධ පොප් ගායිකාවක්. චිත්‍රපටයෙ එන, cranberries සංගීත කණ්ඩායමේ Dreams ගීය ගායනා කරන්නෙත් Faye ම යි. 

Chungking Express අද්‍යක්ෂණය කරන්නෙ හොංකොං ජාතික සුප්‍රසිද්ධ සිනමාකරු Wong Kar-wai. බොහෝම කෙටි කාලෙකින් අඩු පරිශ්‍රමයකින් නිර්මාණය වුණු චිත්‍රපටයක් බව තමා අහන්න ලැබෙන්නෙ. Chungking Express කතා තුනකින් නිර්මාණය කරන්න Wong Kar-wai කල්පනා කලත් තුන්වෙනි කොටස වෙනම චිත්‍රපටයක් විදිහට (Fallen Angels) ඔහු නිර්මාණය කරනව. 

හොං කොං නගරය හඳුන්වන්නෙ ලෝකයෙ වැඩිම ජනගහනයක් වෙසෙන නගරයක් විදිහට. නොයෙක් රටවලින් පැමිණි සංක්‍රමණිකයන්, ගුවන් ගමන් අතර පැමිණෙන සංචාරකයන් මේ ආදි වශයෙන් නොයෙක් ආකාරයෙන් එක් රැස් වුණු මහා ජන ගංගාවක් හොං කොං නමින් හඳුන්වන්නෙ. Chungking Express කියන්නෙ මහ මාර්ග වල තදබද වෙන, කෙටි කෑම කඩ වලින් ආහාර ගන්න, ඉඩ පහසුකම් අඩු නවාතැන් වල ලැගුම් ගෙන ඉන්න, තාවකාලිකව එන යන මිනිස් සමූහයක් අතර ඇතිවෙන බිඳෙන මිනිස් සම්බන්ධතා චිත්‍රනය කරන කැන්වස් තලයක්. Faye, Qiwu, අංක 663.. මේ අය හරහා තමයි Wong kar-wai ජීවිතයේ නොයෙක් හැඩතල මේ කැන්වසයෙ සිතුවම් කරන්නෙ. මේ කතාවල එකට එකක් සම්බන්ධ වෙන බවක් හෝ යම් නිශ්චිත අරමුණක් වෙනුවෙන් ගලා යන ස්වරූපයක් දකින්න ලැබෙන්නෙ නැහැ. ඒත් හිතල බැලුවොත් ජීවිතයත් ඊට වඩා ලොකු වෙනසක් නැහැ නේ. අවසානෙ ලඟාවෙන යම් තැනකට වඩා මේ ගමන ඇතුලෙ අපි ලබන විඳීම් විඳවීම්මයි ජීවිතේ වෙන්නෙ. Chungking Express කියන්නෙත් අන්න එහෙම ගමනක්. මෙන්න මෙහෙමයි කියල වචනෙන් විස්තර කරන්න අමාරු අවිනිශ්චිත ප්‍රේම සංචාරයක්. 

Van Gogh cut off his ear

දවසක්දා වෑන්ගෝ

කපාගෙන තමන්ගෙම කන

දුන්නා එක ගණිකාවකට..

දැකපු ගමන් ඈ

මේ අරුම පුදුම තෑග්ග

වීසි කර දැමුවා

බොහෝම පිළිකුළෙන් ඈතට..

වෑන්ගෝ මිත්‍රයා,

ගණිකාවන්ට ඕන නෑ 

කන්පෙති

ඒ අයට ඕනෑ 

මුදල්..

තේරුණේ නෑ උඹට

කවදාවත්ම

මේ දේවල් හරියට...

අන්න ඒකයි මිත්‍රයා

අතිශ්‍රේෂ්ඨ කලාකාරයෙක් 

වෙන්නෙ උඹ...

.

.

.

Charles Bukowski ගේ පැදියක් ඇසුරෙනි

Bluebird

නිල් කුරුල්ලෙක් ඉන්නවා මගෙ හදවතේ

එළියට එන්න වෙරදරමින්

ඒත් ඉඩ දෙන්නෙ නෑ මම ඌට

මම කියනවා

"ඔහොම ඉඳපන්,

මම ඉඩ දෙන්නෙ නෑ කාටවත්

දැක ගන්න උඹ ඔතන බව."

නිල් කුරුල්ලෙක් ඉන්නවා මගෙ හදවතේ

එළියට එන්න වෙරදරමින්

ඒත් මම 

නෑවී යනකම් හලනවා ඌට

විස්කි වතුර..

වැහෙනකම් උරනවා

සිගරැට් දුම...

ගණිකාවො තැබෑරුම්කාරයො

කඩේ පොළේ අනික් මිනිස්සු

කවුරුවත් දන්නෙ නෑ

ඌ එතන ඉන්නා බව...

නිල් කුරුල්ලෙක් ඉන්නවා මගෙ හදවතේ

එළියට එන්න වෙරදරමින්

ඒත් ඉඩ දෙන්නෙ නෑ මම ඌට

මම කියනවා

"හැංගිලා ඉඳපන් ඔහොම.

උඹ හදන්නේ මාව 

පිස්සෙක් කරන්නද?

මගේ වැඩ සේරම

අවුල් කරලාදාන්න ද?

හොඳ හැටි විකිණෙනවා

මගේ පොත් යුරෝපයේ.

උඹ හදන්නේ ඒකත් නැති කරන්න ද?

නිල් කුරුල්ලෙක් ඉන්නවා මගෙ හදවතේ

එළියට එන්න වෙරදරමින්

ඒත් මම කල්පනාකාරියි හොඳ හැටි..

ඉඩ දෙනවා මම ඌට

සමහරදාට මහ රෑ

හැමකෙනෙක්ම

නිදා ඉන්නා වෙලාවට...

"මම දන්නවා

ඔතන ඉන්නා වග.

ඒ නිසා මොන දේටවත්

දුක් වෙන්න එපා උඹ.."

කියමින් එහෙම

අයෙමත් තියනවා 

හිටි තැනින් මම ඌව...

කුරුල්ලා යන්තමට

සින්දුවක් මුමුණනවා එතකොට...

ඉඩ දෙන්නෙ නෑ මම

මැරෙන්න ඌට..

ඉන්පස්සෙ අපි 

යනවා නින්දට

අපේ රහස් ගිවිසුම එක්කම..

ඒ ටිකම ඇති

වැඩුණු මිනිහෙක් අඬවන්න..

ඒත් මම අඬන්නෙ නෑ,

ඔබත් අඬන්නෙ නෑ නේද?

.

.

.

Charles Bukowski ගේ Bluebird පැදිය ඇසුරෙන් ...

ලෝකයේ හුදෙකලාම නවාතැන

ඔබ හුදෙකලාව ඉන්න කැමති කෙනෙක්ද. මිනිස් ශිෂ්ටාචාරයේ ඝෝෂාවෙන් බොහොම ඈතක මුහුදේ ‍රළ බිඳෙන හඬ පමණක් ඇහෙන පාලු දූපතක වාසය කරන්න ලැබුණොත් ඒක කොහොම තියෙයිද. ඔස්ට්‍රේලියානු නවකතාකරු  M. L. Stedman ගේ The light between ocean නවකතාවේ වගේ ගොඩබිමෙන් එහා සයුරේ මැද එක ප්‍රදීපාගාරයක් සහ නිවසක් පමණක් තිබෙන පාලු දූපතේ රැකියාව සඳහා පැමිණුන තෝමස් ෂර්බොන් ව මගෙ මතකෙට එන්නෙ. මේ නවකතාව ආශ්‍රයෙන් චිත්‍රපටයකුත් නිර්මාණය වුණා. චිත්‍රපටය නැරඹුව නම් මේ ආකරයෙ දූපතක ජීවිතය කොහොමද කියල ඔබට දැකගන්න ලැබේවි. කොහොම වුණත් 

"ලෝකයෙ හුදෙකලාම නිවස" විදිහට හඳුන්වන නවාතැනක් පිහිටා තියනව අයිස්ලන්තය ආසන්න මුහුදේ Ellidaey නම් කුඩා දූපතේ. කාලයක් මේ නිවාසයෙ පින්තූර සමාජ මාධ්‍ය ඇතුළේ පළවීමත් එක්ක මෙතැන සෑහෙන ජනප්‍රියත්වයක් ලබන්න පටන් ගත්ත. 

මේ නිවාසය ගැන නොයෙක් අය විවිධාකාර කතන්දර කියා තිබුණ. සමහර කතා වලට අනුව ලෝකයට පැමිණෙන්න නියමිත සොම්බි වසංගතයකින් ගැලවෙන්න යම් ධනපතියෙක් මෙතැන ආරක්ෂක ස්ථානයක් විදිහට තෝරාගෙන ගොඩනැගූවක් මේ නිවාසය. සමහරුන්ට අනුව මේ ෆොටෝෂොප් වලින් සැකසුව ව්‍යාජ පින්තූරයක්. නමුත් ඇත්තටම මේ දූපත මීට වසර 300 කට කලින් පවුල් පහක් පමණ සිටි කුඩා ගම්මානයක්ව පැවතී තිබුණ බව සොයාගෙන තිබෙනව. 

1930 වසර වනතුරු  මෙහි මිනිස් වාසයක් පැවතී තිබුණා. නමුත් ඉන්පස්සෙ කවුරුත් මෙතන තමන්ගෙ වාසස්ථානය කරගත්තෙ නැහැ. දැනට තියන මේ නිවාසය දඩයම්කරුවන් ගේ තාවකාලික නවාතැන්පොළක් විදිහටයි භාවිතා වෙන්නෙ. දූපත ආශ්‍රිත මුහුද පෆින් කුරුල්ලන් වැඩිවශයෙන් ගැවසෙන කලාපයක්. පෆින් කුරුල්ලන් වඳවී යාමේ තර්ජනයට ලක්ව තිබෙන ජීවි විශේෂයක් විදිහට හඳුනා ගැනුණත් අයිස්ලන්තයෙ මොවුන් දඩයමට නීතියෙන් තහනමක් නැහැ. මේ නවාතැන දැන් අයිති වෙන්නෙ අයිස්ලන්තයෙ ජාතික දඩයම්කරුවන්ගේ සංගමයට. මේ නවාතැනේ විදුලිය හෝ ජල පහසුකම් නැහැ. දඩයම්කරුවන්ගේ  සාමාජිකත්වය ලැබූ අයට හැර වෙනත් අයට මෙතන නවාතැන් ගන්න අවසර නැති බවයි කියවෙන්නෙ. කොහොම වුණත් එක දවසක් මෙතැන ගත කරන්න ලැබුණොත් එය කොහොම අත්දැකීමක් වේවි ද කියන දේ හිතාබලන්න හරි අපූරු යමක් වේවි.

Monsoon wedding (2001)

ඉන්දියාව කියන්නෙ කොයිතරම් සංස්කෘතික විවිධත්වයක් තියන භුමියක්ද කියන කාරණේ මම අමුතුවෙන් කියන්න අවශ්‍ය නැහැ. පුදුමාකාර විචිත්‍රවත් බවක්, වර්ණවත් කමක් මේ කලාපය පුරා පැතිරිලා තියන නොයෙක් සංස්කතීන් වල දැගන්න පුලුවන්. ඇඳුම පැළඳුමේ ඉඳන් කෑම බීම සංගීතය ඇදහිලි විශ්වාස මේ හැම දේකම දකින්න ලැබෙන්නෙ ඒ විවිධත්වය. 2001 අවුරුද්දේ තිරගත වුණු Monsoon wedding චිත්‍රපටයෙන් දැකගන්න පුලුවන් මේ සංස්කෘතියෙ විශේෂම අංගයක් වුණු විවාහ උත්සවයක් ගැන. පන්ජාබයේ නව දිල්ලි නගරයේ ඉහළ මධ්‍යම පාන්තික පවුල් දෙකක් අතර සිද්දවෙන සාම්ප්‍රදායික විවාහ උත්සවයක් ගැනයි Monsoon wedding චිත්‍රපටයෙ කියවෙන්නෙ. මේ විවාහය දවස්ගණනක් පැවැත්වෙන සහ උත්සවශ්‍රීයෙන් පිරුණු එකක්. ඒත් විවාහක් කියන්නෙ උත්ස්වයක් විතරක් නොවෙයි නෙ. දෙදෙකු අතර තියන බැඳීම ආදරය අවබෝධය මේ හැමදෙයක්ම ඇතුවයි දෙදෙනෙක් විවාහයට ඇතුළුවෙන්නෙ. මේ විවාහයෙ මනාලියත් මනමාලයත් එකිනෙකා මුල් වරට දකින්නේත් මේ උත්සවයට සූදානම් වෙන අතරමයි. ඉතින් අර සැණකෙලි සැරසිලි මැද්දෙ මේ දෙන්නට මොකක්ද වෙන්නෙ.

අදිති, ඒ තමා ඇගෙ නම. ඈ සුරූපිනියක් බව ඈ දකින ඕනෑම කෙනෙක් කියාවි. අදිතිගේ අම්මාත් තාත්‍තාත් ඈට පණවගේ ආදරෙයි. ඒ නිසාමයි වැදගත් පවුලකට අයිති සහ හොඳ රැකියාවක් හිමි යහපත් ගති පැවතුම් ඇති තරුණයෙක් වුණු හේමන්ත් ව අදිතිට විවාහ කරන දෙන්න ඔවුන් සූදානම් වෙන්නෙ. හේමන්ත් රැකියාව කරන්නෙ ඇමරිකාවෙ. ඔහු ඉන්දියාවට එන්නෙ කිසිදාක නොදුටු අදිති හා විවාහ කරගැනීමේ අරමුණෙන්මයි. දෙදෙනෙක් විවාහ වෙන්නෙ පවුල් ජීවිතයක් ආරම්භ කරන්නෙ සෑහෙන කාලයක් ආශ්‍රය කරල එකිනෙකාව තේරුම්බේරුම් කරගන්න පුලුවන් බව හොඳහැටි දැනගෙන. (ඇත්තටම ඒක එහෙම වෙනවද කියන දේ වෙනම කතාවක්) නමුත් මෙතන වෙන්නෙ එහෙම නොවෙයි. මුලින් විවාහ වුණාට පස්සෙයි අනෙක් හැමදෙයක්ම සිද්දවෙන්නෙ. ඇත්තටම එහෙම බැඳිමක් කොහොමද ජීවිත කාලයක් පුරා පවත්වගෙන යන්නෙ? එක්වරම මුණගැහුණු දෙන්නෙක් බොහොම කෙටි කාලෙකින් කොහොමද එකිනෙකාව තේරුම් ගන්නෙ? ආදරයක් එතන කොහොමද ඇති වෙන්නෙ? මේ ප්‍රශ්නවලට උත්තර හොයාගන්න නම් ඔබට චිත්‍රපටය බලන්නම වෙනව. 

Monsoon wedding චිත්‍රපටය අධ්‍යක්ෂණය කරන්නෙ ඉන්දියානු සිනමාව ලෝකයට විවර කරන්න මෑත කාලීනව ඉහලම දායකත්වයක් දුන්න සිනමාකාරියක් වුණු Mira Nair. ඉන්දියාව ලෝකයේ ලොකුම සිනමා කර්මාන්තයක් වුණත් එයින් පිටස්තර ලෝකයෙ අවධානය දිනාගන්න සිනමාපට බිහිවෙන්නෙ නම් තරමක් අඩුවෙන්. බොහෝවෙලාවට බටහිර රටවල මේ චිත්‍රපට ගැන තියෙන්නෙ ඒ තරම් හොඳ ආකල්පයක් නොවෙයි. නමුත් Mira Nair මේ සීමාව ඉක්මවා ගිය නිර්මාණකාරියක්. ඇගේ චිත්‍රපට ඉන්දියාවෙන් එහා ලෝකයෙ විශේෂයෙන් ඇමරිකාවේ සහ යුරෝපිය රටවල සෑහෙන ඇගයුමටත් ජනප්‍රියත්වයටත්  ලක්වෙනව.  Salaam Bombay, Mississippi Masala, Kama Sutra: A Tale of Love, Vanity Fair, The Namesake, Queen of Katwe මේ මීරා නායර් අධ්‍යක්ෂණය කල ඉන්දිය සහ ඉන්දියානු නොවන සිනමා නිර්මාණ. ඈ කොයිතරම් පරාසයක විහිදී ගිය සිනමාකාරියක් ද කියන කාරණය වටහ ගන්න පුලුවන් මේ නම් ලයිස්තුවෙන්.

සමාන්‍යයෙන් නැටුම් ගැයුම් කියන්නෙ නම් ඉන්දියානු චිත්‍රපටයක අනිවාර්ය අංගයක් වගේ දෙයක්. Monsoon wedding චිත්‍රපටයෙත් මේ දේවල් දැකගන්න පුලුවන්. නමුත් බහුලව හින්දි චිත්‍රපට වල දකින්න ලැබෙන අතාත්ත්වික ආකාරයෙන් නොවෙයි. ඒ තැන් වලදිත් චිත්‍රපටයෙ තියන යථාර්ථවාදි බව ආරක්ෂා කරගන්න Mira සමත්වෙලා තියනව. චිත්‍රපටයෙ ප්‍රධාන කතාවට අමතරව තියන අතුරු කතා ඉතාම සින්ගන්නාසුළු ආකාරයෙන් ඉදිරිපත් වෙනව. එක විවාහයක් ඇතුලෙ තව විවාහ කීපයකටම වැඩ සිද්දවෙන ආකාරය පෙන්නා දෙන විදිහ අපූරුයි. ඒ වගේම පවුල ඇතුලෙ සම්බන්ධතා, දෙමව්පියන් දූදරුවන් අතර බැඳීම, දෙදෙනෙක් අතරෙ ඇතිවෙන ප්‍රේමාන්විත බැඳීම්, මේ හැමදෙයක්ම මූලික කතා තේමාව ඇතුළෙ ගලපල තියන විදිහ අති විශිෂ්ටයි. Monsoon wedding මම දැක්ක ලස්සනම, වර්ණවත්ම ඉන්දියානු චිත්‍රපට කිහිපයට ඇතුලත් වෙන සිනමා නිර්මාණයක්. චිත්‍රපටය බැලුවොත් ඒ කාරණේ ඔබටත් එහෙමම අත්විඳින්න ලැබෙන බවට නම් සැකයක් නැහැ.

-hAsH-

Monsoon wedding 

- Directed by

Mira Nair

- Written by

Sabrina Dhawan

- Starring

Naseeruddin Shah

Randeep Hooda

Tillotama Shome

Lillete Dubey

Shefali Shah

Vasundhara Das

Vijay Raaz

Rajat Kapoor

Jas Arora

When you see water in a stream

දුටු විටෙක ඔබ

කුඩා දොළ පහරක

ගලා යන දිය දහරට

ඔබ කියයි ඒ දොළෙහි දිය බව...

දුටු විටෙක ඔබ

රළ නඟන ගංගාවද

ඔබ කියයි එහි ඇත්තේ 

ගං දිය බව..

එලෙසින්ම සයුරක

විසල් දිය තලයට

ඔබ කියයි සයුරු දිය බව....

එනමුදු 

ඔබ කොයි නමින් කීවද

ජලය නම් අන් කවරක්ද

ජලයම මිසක..

එය රැඳී තිබෙනා 

කොයිදෙයක හැඩය ගත්තද

සැදී තිබුණත් එයින්

මේ සෑම සියලු තැන

හිමිකම් නොමැත ජලයට

මේ එකදු තැනකට..

ඔබ ද එලෙසම ය..

.

.

.

Alice Walker ගේ පැදියක් ඇසුරෙන්

Introduction to Poetry

පැවසුවා මම ඔවුන්ට

අරගන්න කවියක්

වර්ණ වීදුරු කැබැල්ලක් සේ

අල්ලා බලන්න එය

හිරු එළියට

නැත්නම් කණ තබා

සවන්දෙන්න එහි

ඇතුළතින් ඇසෙනා 

ගුමු ගුමුවට...

පැවසුවා මම

කැළෑ මීයෙකු ගෙන

දමන්නැයි කවියක් මැදට!

බලන්න එතුළ ඌ

පිටවන මඟක් සොයාගත නොහැකිව

අතරමං වන අයුර..

ඇවිද යන්න කවියක

ඇතුළු කාමර අතර

පැතිරුණු ගණ අන්ධකාරේ

ආලෝකයක් සොයාගනු රිසින්

අත තබමින් එහි බිත්ති මතට..

මට අවැසි වූවා ඔවුන්

කවියක විසල් දියතලය මතින්

ලිස්සා යමින් ක්‍රීඩා කරනයුරු දකින්නට

අතවනමින් ඈත වෙරළේ

ලියවුණු කවියාගේ නමට..

එනමුදු ඔවුන් කළ දේ නම්

වැරෙන් අල්ලාගෙන කවිය 

පුටුවකට තබා බැඳීමයි..

ඉන්පසු තළා පෙළා එය

කළ කී සියලු දේ ගැන

පාපෝච්චාරණය කරවීමයි...

පහර දී ඔවුන්

වධ දුන්නා කවියට

විමසමින් එහි ඇති

සැබෑ වූ යම් අරුතක්

දැනගනු පිණිස..

.

.

Billy Collins ගේ Introduction to Poetry පැදිය ඇසුරෙන්.

The Florida project (2017)

මෑත කාලෙදි ඩිස්නිලන්තය කියන වචනෙ අපේ ශබ්දකෝෂය ඇතුලෙ අලුතෙන් අරුත්ගැන්වෙනව. ඒ සිද්දිය ආයෙමත් මම මතක් කරන්නෙ නැහැ. ඒ වචනෙ එළියට එන්නෙ අපි ජීවත්වන මේ රටේ තියන ජරාජීර්ණ දේශපාලන ක්‍රමය ගැන අප්‍රසාදය පළකිරීමක් විදිහට. ඒ යෙදුම උත්ප්‍රාසයක්. ඒ කියන්නෙ වචනෙන් අර්ථගැන්වෙන්නෙ ඊට ප්‍රතිවිරුද්ධ දෙයක්. ඩිස්නිලන්තය කිව්වම ඔලුවෙ මැවෙන්නෙ සැණකෙළි සතුට උතුරායන විනෝදකාමි තැනක් විදිහට. අපේ රට ඩිස්නිලන්තයක් විදිහට නාමකරණය වෙන්නෙ මේකෙ විරුද්ධ අර්ථයෙන්. ඇත්තම ඩිස්නිලන්තය පිහිටා තියෙන්නෙ ඇමරිකාවේ. ඇමරිකාව ගැන අපිට තියෙන්නෙ සහ ඇමරිකාවත් ලෝකයට පෙන්වන්නෙ තමන්ගැන මේ වගේ ඩිස්නිලන්තමය අදහසක්. හැබැයි මේ ඩිස්නිලන්තයෙත් ඉන්නව තටු කැඩිච්ච සුරංගනාවියො. පාර වැරදුන දේවදූතියො. මුදලට විකිණෙන සින්ඩරෙල්ලලා. කේශ කලාපය වර්ණගන්වාගෙන හන්දි ගානෙ හිටගෙන ඉඳල එදාවේල හොයාගන්න රපුන්සල් ලා. The Florida project කියන්නෙ අන්න ඒ අඳුරු පරිච්ඡේදය ගැන කතාවක්. 

"අඳුරු" කිව්වට Florida project කියන්නෙ කෙනෙකුට දකින්න ලැබෙන වර්ණවත්ම චිත්‍රපටයක්. වර්ණවත් පසුතලවල පෙනී නොපෙනී බොඳ වෙලා තියෙන්නෙ ජීවිතවල ඇතුළාන්ත අඳුර. මේ කතාවේ ප්‍රධාන චරිත වෙන්නෙ අවුරුදු හයක වයස පුංචි දුවෙක් (Moone) සහ තරුණ අම්ම කෙනෙක් (Halley). Halley දුටුව ගමන් ඈ අමුතු ආකරයෙ ගැහැණියක් බව පෙනෙන්නෙ. ඇගෙ කොණ්ඩය කොළ පාටින් වර්ණ ගැන්විල තියෙන්නෙ. යටි තොලේ කුඩා මුදුවක් පැළඳිල. පපුවෙ විශාල රතු රෝස මල් දෙකක ටැටූවක් ඇඳිල. ඇගෙ අත්පාවලත් තියෙන්නෙ වෛවර්ණ ටැටූ හැඩතල. Mooney අසීමිත විදහට දඟකාර, කාටවත් කීකරු නොවෙන, නාහෙට නාහන පුංචි ගෑනු ලමයෙක්. ඈ එක අතකට ඇගෙ අම්මගෙම කුඩා අනුරුවක් වගේ. මේ දෙන්න නැවතී ඉන්නෙ ඩිස්නිලන්තය සමීපයේ, සංචාරකයන් ලැගුම්ගන්න Magic Castle නම් අඩු වියදම් නවාතැන්පළේ. Magic Castle බිත්ති පුරා තැවරී ඇති ලැවැන්ඩර් වර්ණය මෙතනට ගේන්නෙ අමුතු හැඩයක්. නමුත් ඇතුළත කාමරවල තියෙන්නෙ අඳුරු දම් පාටක්. Bobby තමයි මෙතන බාරකරු. නවාතැන හරියට පිළිවෙලට පිරිසිදුව පවත්වාගැනීම සහ ඇතුලෙ ඇතිවෙන නොයෙක් ආකර ප්‍රශ්න විසඳීම Bobby ගෙ රාජකාරිය වෙන්නෙ. Halley ට ජීවත්වෙන්න ස්ථීර ආදායමක් නෑ. නොයෙක් දේවල් කරමින් ඈ එදාවේල හොයාගන්න උත්සාහ කරනව. මේ අතර අහල පහළ එයාගෙ හොඳම මිත්‍රයා Scooty එක්ක එක්ක කල්ලි ගැහෙන Mooney නිදහසේ ළමා ලෝකේ සැරිසරමින් අයාලේ යමින් කාලෙ ගත කරන්නෙ. Bobby මොන රාජකාරිය තිබුණත් පොඩි දරුවන් ගැන අවධානෙන් ඉන්නෙ. ළමයින්ට කරදරයක් වෙන්න Bobby ඉඩ තියන්නෙ නෑ. ඔය විදිහට ළමා ලෝකයත් වගකීම් පිරුණු වැඩිහිටි ලෝකයත් අතරෙ මේ කතාව ගලා යන්නෙ. මූලික කතාපුවතකට වඩා Halley ගෙත් Mooney ගෙත් ජීවතවල කුඩා සිදුවීම්වලින්, එදිනෙදා අත්දැකීම්වලින් The Florida project නිර්මාණය වෙන්නෙ.

අවුරුදු ගණනාවක් අතීතයට ගිහිල්ල අපේම ළමා කාලය මතක් කරගත්තොත් බොහොම සුන්දර, නිදහස් ලෝකයක් අපි දැක්කෙ. Florida project ඇතුළෙ තියන වර්ණ පිරුණු, සනීපවත් බවට පසු බිම්වෙන්නෙ ඒ කාරණාව වෙන්න පුලුවන්. මොකද චිත්‍රපටය කේන්ද්‍රගත වෙන්නෙ Mooney වටා. ඇගේ ළමා ලෝකය මුල් කරගෙන. වැඩිහිටි ඛේදවාචකය මේ ලෝකය මත කඩාවැටෙන්න පටන් ගන්නකොටයි එතැන තියන අර සුන්දරකම දියවෙලා යන්න පටන් ගන්නෙ. නමුත් ළමයි තමන්ගෙ සතුට හොයා යන්නෙ තමන්ගෙම ක්‍රමයකට. අනික් පැත්තෙන් ඇමරිකාව කියන සුරපුරයේ අතරමං වුණු, පරිභෝජන මුල් කරගත්ත ධනවාදී අර්ථක්‍රමය ඇතුළේ සමාජය ඇති නැති විදිහට  ස්ථරවලට  වෙන් වෙද්දි එයින් පහළට ඇදවැටුණු අංශුමාත්‍රික ජීවිත කිහිපයක් ගැන වඩා යථාර්ථවාදී සමීප විමසා බැලීමක් විදිහටත් මේ චිත්‍රපටය හඳුන්වන්න පුලුවන්.

The Florida project 

Directed by

Sean Baker

Written by

Sean Baker

Chris Bergoch

Starring

Willem Dafoe

Brooklynn Prince

Bria Vinaite

Valeria Cotto

Christopher Rivera

Caleb Landry Jones

Cinematography

Alexis Zabé

සමහර ගණුදෙණු

කවුන්ටරයේ මැද

වීදුරු පවුරකින් පිට

වාඩිවී හිඳිනා මහත්මිය...

මෙතෙක් කල තැන්පතු ද

ආපසු ගනු ලබන අගයන් ද

ගණිතමය ගැටළු විසඳන..

රන් පැහැය දිදුලන

වර්ණ ගැන්වූ කෙහෙරැළි 

ඇයි සුළඟ සමඟින් අමනාප 

ඔය තරමට..

අඩක් විවරවු කවුළුවෙන්

පෙරී එන ළා හිරු රැස

කොපුල මත අඳින සෙවණැළි

මනහර..

බොහෝ කුඩාය අගයන් 

මා අතැති පත්‍රයෙහි

හිස් තැන් අතර ලියවුණු...

එබැවින් වඩාත් පහසුය

මේ ගණුදෙණු...