Joji (2021)

Dark knight චිත්‍රපටයේ  හීත් ලෙජර් රඟදක්වපු සදානුස්මරණීය ජෝකර් චරිතය කියන අපූර්ව දෙබස් ඛණ්ඩයක් තියනව. "පිස්සුව කියන්නෙ හරියට ගුරුත්වාකර්ෂණය වගේ දෙයක්. ඒකට ඕන කරන්නෙ පොඩි තල්ලුවක් විතරයි" කියල. මිනිස් මනස කියන්නෙ සියලු ආකාරයෙ යහපත් වගේම අයහපත් විදිහට අපි නම් කරන සිතුවිලි සිරගතවුණු තැනක්. ඒත් මේ අයහපත් කියල හඳුන්වන සිතුවිලි සමාජය විසින් පිළිනොගන්න නිසාත් ඒව මිනිස් පැවැත්මට හානිකරයි නැත්නම් සදාචාර විරෝධී කියල හඳුන්වල තියන නිසාත් මනස ඇතුලෙ මේ සිතුවිලි යටපත්වෙලයි තියෙන්නෙ. යම් බාහිර බලපෑමක් නිසා මේ සිතුවිලි ඉතාම සියුම්ව අපි තුළින් ක්‍රියාකාරි වෙන්න හැකියාව තියනව. ජෝකර් ගෙ අර කියමන අපිට අර්ථගන්වාගන්න පුලුවන් එහෙම.

තව කෙනෙක් හෝ පිරිසක් තමන්ට උවමනා ආකාරයට පාලනය කරගන්න, නැත්නම් තමන් පිරිසක් අතරෙ තමන් බලගතු කෙනෙක් බව හිතන්න මනසට තියෙන්නෙ ඒ ආකාරයෙ පිස්සුවක්. ශේක්ස්පියර් ගේ මැක්බත් ඉඳන් ගේම් ඔෆ් ත්‍රෝන්ස් වෙනකම් කලා නිර්මාණවල, දේශපාලනිකව වගේම ජීවිතේ සම්බන්ධකම් ඇතුළෙ බලය ලබා ගැනීමේ අසීමිත ආශාව නිසා ඇතිවෙන ව්‍යාකූලත්වය පෙන්වාදී තිබුණ. මෙතනදි බලය යනුවෙන් හඳුන්වන්නෙ තව කෙනෙකුගෙ පැවැත්මට බලපෑම් කරන්න කෙනෙකුට ඇති හැකියාව. බලය ඉල්ලා සිටින්නෙ නිතරම තමන් යම් වටිනා කෙනෙක් නැත්නම් පිරිසක් අතර විශේෂ පුද්ගලයෙක් බව තහවුරු කරගන්න වෙර දරන මමත්වය. 

මැක්බත් කියවල,  නැත්නම් ඒ ආශ්‍රයෙන් නිර්මාණය වුණු චිත්‍රපට නරඹා ඇති කෙනෙක් දන්නව මැක්බත් ඔහුගෙ බිරිඳ ගෙ බලපෑමෙන් රජකම ලබා ගන්නත් පවත්වාගැනීමත් වෙනුවෙන් ඕනෑම දුෂ්ටකමක් කරන්න පෙළඹවෙන ආකාරය. ශේක්ස්පියර් ගේ අනෙකුත් නිර්මාණ වගේම මැක්බත් කියන්නෙත් ජීවිතය බොහොම ගැඹුරින් නිරූපණය කරන නාටකයක්. මැක්බත් කතාව අනුසාරයෙනුයි Joji මලයාලම් චිත්‍රපටය නිර්මාණය වෙන්නෙ.

 Kuttappan කේරළයෙ ගමක ජීවිත්වෙන ව්‍යාපාරිකයෙක්. හැඩිදැඩි පුද්ගලයෙක් වගේම ගමේ යම් බලයක් ගොඩනගාගත්ත මනුස්සයෙක්. Kuttappan ට ඉන්නෙ පුත්‍රයන් තුන්දෙනෙක් Jomon, Jason සහ Joji. දවසක් හදිස්සියෙ රෝගාතුරවෙන Kuttappan ගෙ ශරීරයෙන් අඩක් අඩපණ වෙනව. තමන්ගෙ ව්‍යාපාරික අධිරාජ්‍ය වෙනකෙකුට පවරා දෙන්න kuttappan සූදානම් නෑ. නමුත් kuttappan ගෙ පුත්‍රයන් තුන්දෙනා බලා ඉන්නෙ දේපළ බෙදෙන්නෙ කොහොමද, තමන්ට අයිති වෙන්නෙ මොනවද වගේ දේවල්. නොකිව්වත් පුතුන් තුන්දෙනාට ඕන කරන්නෙ පියාගෙ මරණය බව රහසක් නොවෙයි. මේ අතරෙ යමක් කලයුතුයි කියන මානසිකත්වයෙන් ක්‍රියාත්මක වෙන්නෙ බාල පුත්‍රයා Joji. ක්‍රමයෙන් සහ සූක්ෂමව පියාගෙ මරණය වෙන තැනට ඔහු වැඩ කරනව. දෙවනි සහෝදරයා Jason ගේ බිරිඳ Binsy මේ හැම දෙයක්ම දන්න නමුත් Joji ට තවත් අනුබල දෙනවා මිසක් ඇය ඔහුව වලක්වන්නෙ නෑ. තමන්ට කල නොහැකි දෙයක් Joji ලවා කරවාගැනීම ඇගෙ අරමුණ.  

Joji පවුලේ බාලයා. Joji ට කිසිදෙයක් හරියට කරගන්න බෑ කියන අදහස තමා පවුලේ හැමකෙනෙකුටම තියෙන්නෙ. Joji නමෙනුත් කියවෙන්නෙ පොඩි එකෙකුගෙ වගේ හැඟීමක්. තමන් නිකම්ම නිකමෙක් නොවෙන බවත් යමක් කමක් කරන්න හැකියාව තමන්ට තිබෙන බව ඔප්පු කරගැනීමේ තදබල උවමනාවක් Joji ට තිබෙන බවයි අපි මුල පටන්ම දකින්නෙ. උදාහරණ විදිහට  Joji ව තිරයෙ මුලින්ම දැකගන්න ලැබෙන, තුවක්කුව සම්බන්ධ සිද්දිය අරගන්න පුලුවන්. Jason ගෙ පුත්‍රයාට Joji බැනවැදිල තුවක්කුව තමන්ට අයිති කරගැනීමෙදි පෙනෙන්නෙ නැති බලවත්කමක් තමන්ට ආරෝපණය කරගන්න ගන්න උත්සාහය.

Joji සුපුරුදු කේරළ ගැමි ජීවිතය පසුබිම් කරගත්ත මලයාලම් චිත්‍රපටයක් වුණත් මලයාලම් සිනමාවෙ නිතර අපි අත්විඳින feel good ස්වභාවය වෙනුවට Joji චිත්‍රපටය පුරා තිබෙන්නෙ අඳුරු ගුප්තමය ස්වභාවයක්. චිත්‍රපටයෙ සංගීතයත් මේ අඳුරු බව හොඳින්ම මතුකරගන්න යොදාගෙන තිබෙන ආකාරය විශේෂයි. චිත්‍රපටයෙ තේමාව එක්ක ඒ අසුබවාදී, අඳුරු බව හොඳහැටි පෑහෙනව. 

Joji ගැන කතාකරද්දි කතා නොකරම බැරි දෙය Joji ගේ චරිතය නිරූපණය කරන Fahadh Faasil ගේ රඟපෑම. අධ්‍යක්ෂවරයෙකුට Fahadh Faasil කියන්නෙ මූර්ති ශිල්පියෙකුට මැටි පිඩක් වගේ අදාල චරිතය විසින් ඉල්ලන ඕනෑම හැඩයක් මතු කරගත හැකි නළුවෙක්. කේරළේ පමණක් නොවෙයි සමස්ත ඉන්දියාවේ ම මේ සමත්කම තියෙන නලුවන් ඉන්නෙ අල්පයයි. Faasil සැකයක් නැතිවම ඒ හැම කෙනෙකු අතරෙම ඉහළ තැනකින් තමන්ව තැබිය හැකි බව ඔප්පු කර පෙන්වා හමාරයි. Joji අධ්‍යක්ෂණය කරන්නෙ Fahadh ගේ ම රංගනයෙන් හැඩ වුණු Maheshanthi Prathikaram අද්‍යක්ෂණය කල Dileesh Pothan. තිරපිටපත ලියන්නෙ Maheshanthi Prathikaram, Kumbalangi Nights වගේ මලයාලම් සිනමාවෙ මැණික් කැට වගේ හඳුන්වන්න පුලුවන් චිත්‍රපට රචනා කල Syam Pushkaran. Fahad, Dileesh සහ Syam කියන මලයාලම් සිනමාවේ දැනට ඉන්න බලකණු තුනක මූලිකත්වයෙන් නිර්මාණය වුණු Joji ගැන බොලිවුඩ් නලුවෙක් වෙන Gajraj Rao සෑහෙන ප්‍රශංසාත්මක අදහස් කීපයක් instagram සමාජ මාධ්‍යයේ පළ කර තිබුණා. මේ දකුණු ඉන්දියානු සිනමාවේ පවත්වාගන්න ගුණාත්මක බව සෑහෙන අගය කරන Rao බොක්ස් ඔෆිස් ආදායම් ඉලක්ක කරගෙන වගේම හර සුන් ප්‍රතිනිෂ්පාදන (Remake) නිසා දිනෙන් දින බොලිවුඩ් සිනමාව කඩා වැටෙමින් තිබෙන බවට චෝදනාවකුත් කර තිබුණා. Fahadh ලා ගෙන් Shyam ලා ගෙන් බොලිවුඩයට පමණක් නොවෙයි අපිටත් ඇත්තට කොයිතරම් දේවල් ඉගනගන්න පුලුවන් ද?