මුතුකැට අකුරෙන් ලියා
ඈ දුන්න ලයිස්තුව
රැගෙන සාක්කුව පතුලෙන්
නැමුම් දිග හැර
තුනට හතරට නැමුව
ඇවිද යමි පොළ පුරා
හෙට්ටු කර වෙළඳුන් සමඟ
සොයමින් ලාබ එළවලු කඩ..
ඒ අතර පැමිණෙයි ඔබ
එක් අතකින් ගෙන පුතුගෙ අත
අනෙක් අත මල්ල.
මීන ඇස් යුග වැසූ
ඝන රාමු උපැස් යුවළ
හදමින් වරින් වර
ඔබ යයි මා පසු කර...
"මොනාද අම්මෙ ගන්නෙ"
පුංචි පුතු අසයි
"අපි ගම්මු පුතේ.. නෝකෝල්"
එවිට ඔබ කියයි
අතේ ඇති එළවලු මල්ල
විසී කර අහසට
සෙනඟ මැද
මහා හයියෙන්
මහා හයියෙන්
කෑ ගසා හිනා වෙන්නට
එවිට මට හිතෙයි..
No comments:
Post a Comment