ඈ වෙසෙනා නිවහන

බොහෝ උස් පවුරකින් වට වී

තිබෙයි ඈ වෙසෙනා නිවහන 

වා කවුළු ඉදිකර තිබුණද පළින් පළ

විවර නොවේ කිසිවක් සුළඟකට.

වැසි වසිත් මෙහි කලට නොකලට

නොයයි බිඳුවක් රළු බිත්ති පසුකර

කිසියම් තෙතක් හෝ මෙතක් නොරැඳෙනා ලෙස

පායා ඒ ය සැඩ හිරු මේ පොළව මතුවට.

වියළි තණපලසට ඈ කුටිය අබියස

අමතකය ලද බවක් කිසි දිනක ඈ පා පහස

ගෙ උයනේ කොණක පටු උද්‍යාන බංකුව මත

ඈ උන් බවක් දැක නැත සියොතුන් ද.

එහෙත් හිතවතුනි රෑ මැදියමට

සඳ තරු පවා නිදිගත්ත මොහොතක

යම් කුඩා කණමැදිරි එළිබිඳක් 

ඈ නිදන කුටියෙන් මතුව එන බව 

දැක තිබේ නොනිදා ගී ගයන රැහැයියන් කැල.