ඉන්දියානු කලාපය ඇතුලෙ මලයාලම් සිනමාව මේ තරම් කැපී පෙනෙන්නත් ආකර්ෂණයක් දිනාගන්නත් එක් හේතුවක් වෙන්නෙ මේ චිත්‍රපට වලින් පෙන්වා දෙන්නෙ එදිනෙදා සාමාන්‍ය මනුස්සයාට දැනෙන කරුණු කාරණා ගැන වීම නිසා. බොහෝ වෙලාවට පවුල සහ ඒ ඇතුලෙ තියන මා පිය දූදරු සම්බන්ධතා ගැනයි මේ චිත්‍රපටවලට වස්තුවිෂය වෙන්නෙ. දෙමව්පියෝ දරුවෝ කියන්නෙ ඕනෑම කෙනෙකුට හදවතට දැනෙන්න කතා කරන්න පුලුවන් මාතෘකාවක්. කෙනෙකුගේ ජීවිතයට වැඩිම බලපෑමක් කරන්න පුලුවන් සාධකයක් තමා තමන්ගෙ පවුල කියන්නෙ. මලයාලම් සිනමාකාරයින් අල්ලගන්නෙ අන්න එතනින්. 2021 අවුරුද්දේ අතිශ්‍ය ජනප්‍රසාදයක් දිනාගත්තු Home චිත්‍රපටයෙත් පිටුපස තියන කාරණාව මෙන්න මේකයි.
Kaanekkaane 2021 අවුරුද්දේ නිකුත්වුණු මේ වගේම ප්‍රේක්ෂකයන්ගේ හදබැඳගත් තවත් චිත්‍රපටයක්. Kaanekkaane ඇතුළෙන් දකින්න ලැබෙන්නෙ පවුල මුල් කරගත් කතාපුවතක් වීම යන පොදු සාධකයමයි. ඒ වගේම හදවතට දැනෙන සිනමා අත්දැකීමක් කියන ගුණාංගයත් මේ චිත්‍රපටයෙ ඉතාම ඉහළයි. යම් thriller ලක්ෂණයකුත් දැකගන්න ලැබුණත් කතාවේ හරය තියෙන්නෙ අඹු දරුවන් අතර තියන සම්බන්ධතාව කියන තැනින්. කතාව හෝ වෙනත් යමක් මම විස්තර කරන්නෙ නැහැ. නමුත් චිත්‍රපට නරඹන කෙනෙක් මග නොහැර නැරඹිය යුතු කතාවක් බව කියන්නම්. ප්‍රධාන චරිත නිරූපණය කල Tovino Thomas ගේ සහ රංගනය සහ Suraj Venjaramoodu ගේ රංගනයන් හොඳින්ම කැපී පෙනුනා. Aishwarya Lekshmi තමන්ගෙ කොටස හොඳින්ම ඉටුකර තිබුණා. Tovino ගේ කඩවසම්ම රූපකාය දැකගන්න ලැබෙන්නෙ මේ චිත්‍රපටයෙන් මට අනුව. Kaanekkaane අවසානෙ වීරයන් හෝ දුෂ්ටයන් ඉතිරි නොවන සැබෑ මිනිසුන්ගේ මිනිස් සබඳතා ගැන කතා පුවතක් බව කියන්නම්.
No comments:
Post a Comment