Monday, October 22, 2018

යම් නොපෙනෙන මිනිසෙක් - An Invisible man


මේ අවන්හලේ
විදුලි එළි අඩ අඳුරේ
මගේ අසුනට යාබදව
බීර වීදුරුවක් තොල ගාමින් සිටියි
යම් නොපෙනෙන මිනිසෙක්..

හිරු ගිණියම් වන දහවලේ
නගරයේ මහ සෙනඟ මැද්දේ
සල් පිල් දිගු වීදි අතරේ
පිස දමා දමා නළලට එන ඩා බිඳු
උරින් දරා තම කුඩා දියණිය
ගමන් කරමින් සිටියි
යම් නොපෙනෙන මිනිසෙක්...

සංගීත සන්ධ්‍යාවේ 
රිද්මේ ඉහළ නැංවෙන මොහොතේ
තට්ටු කරමින් මේස කකුලකට
උච්ච ස්වරයෙන් ගැයෙන් ගීයකට
තාලය අල්ලයි
යම් නොපෙනෙන මිනිසෙක්...

ගලා එන මොටෝරථ පෙළ
අත දිගුකර නවත්වා මොහොතකට
මහළු මවක් වාරු කරගෙන
මාවතෙන් එතෙර කරවයි
යම් නොපෙනෙන මිනිසෙක්...

කණමැදිරි එළි විසිරුණු රෑ මැද
නිදිනොඑන දෑස් යුග අඩවන් කර
මේසය මත ඇති සුදු කඩදාසියක් මත
කාබන් පෑනකින් කටුගායි
යම් නොපෙනෙන මිනිසෙක්..

කාලයේ වල් බිහිවී වැඩී ගිය
සරු පොළවක පස් යට සීරුවට
හොවා වෙඩි උණ්ඩයකට සිදුරු වූ ළය
සීතලට ගුලි වී හිඳියි 
එක්තරා මිනිසෙක්..





4 comments: