Tell no one (2006)

 අපි මේ ලෝකෙ වැඩියෙන්ම ආදරේ කරන කෙනෙක් මියයනව ඒ කියන්නෙ සදහටම ජීවිතෙන් සමුගෙන යනව කියන කාරණය ඒ තරම් පහසුවෙන් දරාගන්න පුලුවන් යමක් නොවෙයි. හැබැයි ඒ මරණය කොහොම, කොයි ආකාරයකින්, කවුරුන් අතින් වුණාද කියල හොයා ගන්න බැරි විදිහෙ මහ අබිරහස් එකක් නම් තවත් ඒක ඉවසගන්න අමාරු වෙයි. ඒ මරණය ගැන සැකය යොමු වෙන්නෙ තමන්ගෙ පැත්තට නම් ඉතින් ඊටත් වඩා ඉවසන්න සෑහෙන අමාරු වෙයි. ළමා රෝග සම්බන්ධ වෛද්‍යවරයෙක් වෙන ප්‍රංශ ජාතික ඇලෙක්ස්ටත් එයා පණ වගේ ආදරය කළ බිරිඳ මාගොට් ගෙ මරණය ගැන දැනුනෙ එහෙම. ඇලෙක්ස් සහ මාගොට් කියන්නෙ වැලි සෙල්ලම් කරන කාලෙ පටන් එකට හැදුණු වැඩුණු දෙන්නෙක්. මාගොට් තරම් ඇල්ක්ස්ව හඳුනන කෙනෙක් තව හිටියෙ නෑ. ඒ හින්ද පහු කාලෙක ඇලෙක්ස් මාගොට්ව තමන්ගෙ බිරිඳ කරගත්ත කාලෙකත් ඇය තරම් මේ ලෝකෙ කිසිම කෙනෙකුට ඔහු ආදරය කලේ නෑ. ඒ හින්දම ඇයව අබිරහස් ආකාරයට මරා දමා තිබීම ඔහුව ඇද දැම්මෙ දුකින් වේදනාවෙන් පිරුණු ජීවිතයකට. ඇයගෙ මරණෙට ඔහුත් සැකකාරයෙක් වීම ඔහුට තව තවත් පීඩා කළා. මේ බිරිඳගෙ මරණයට සමකාලීනව සිද්ද වුණු තවත් අබිරහස් මරණ ගණනාවකටම වගකිවයුතු දාම ඝාතකයෙක් (Serial killer) පොලීසිය අල්ලාගන්න සමත් වුණත් මාගොට් ගේ මරණයට තමන් සම්බන්ධයක් නැති බවට ඔහු පාපොච්චාරණය කර තිබුණා. 

මේ ආකාරයෙ වේදනාත්මක අවුරුදු අටක් කෙළවර හැමදෙයක්ම අනික් පැත්ත හැරෙන්න පටන් ගන්න එක සිදුවීමක් වෙනව. අවුරුදු අටකට පස්සෙ, ඇලෙක්ස්ට ඔවුන්ගෙ විවාහ සංවත්සර දවසෙදි මාගොට් ගෙන් ඊ මේල් පණිවුඩයක් ලැබෙනව. එතැන පටන් ඇය මිය ගියේ නැති බවත් කොහේ හෝ තැනක ඇය තවමත් ජීවතුන් අතර ඉන්නා බවත් ඇලෙක්ස් විශ්වාස කරන්න පටන් ගන්නව. නමුත් මාගොට් මරා දමල, ඇගේ අවසන් කටයුතුත් කරල ඇයව මිහිදන් කරලත් අවසානයි. ඒත් මිය ගිය කෙනෙක් ගෙන් කොහොමද තවත් කෙනෙකුට ඊ මේල් පණිවුඩයක් ලැබෙන්නෙ? ඇය වෙනුවන් ඉපදුණු ආදරයේ උමතුවෙන් තවදුරටත් ඇගෙ මරණය ගැන සොයා යන ඇලෙක්ස්ට තමන් කිසිදාක නොදැනසිටි රහස් ගණනාවක්ම අනාවරණය කරගන්න ලැබෙනව. ඇත්තටම මාගොට් මිය ගියා ද? ඇයව මරා දැම්මෙ කවුද? එහෙම නම් මියගිය මාගොට් ගෙන් ඇලෙක්ස්ට ඊ මේල් පණිවුඩයක් ලැබෙන්නෙ කොහොම ද? මේ ප්‍රශ්නටිකට උත්තර හොයාගන්න නම් ඔබට 2006 අවුරුද්දේ ප්‍රංශ භාෂාවෙන් නිර්මාණය වුණ Tell no one චිත්‍රපටය බලන්න වෙනව.

Tell no one චිත්‍රපටය නිර්මාණය වෙන්නෙ 2001 අවුරුද්දේ Harlan Coben නම් ඇමරිකානු ලේඛකයා මේ නමින්ම ලියා පළ කළ නවකතාව ආශ්‍රයෙන්. Tell no one ආදායම් අතින් වගේම ප්‍රේක්ෂක/ විචාරක කණ්ඩායම් අතිනුත් සෑහෙන හොඳ ප්‍රතිචාර ලබනව. ඒ වගේම 2007 ප්‍රංශයේ ජාතික සිනමා සම්මාන උළලේ (César Awards) මේ චිත්‍රපටය වෙනුවෙන් හොඳම අධ්‍යක්ෂණය ( Guillaume Canet) හොඳම නලුවා (ඇලෙක්ස් ගේ චරිතය වෙනුවෙන් François Cluzet), හොඳම සංස්කරණය, හොඳම පසුබිම් සංගීතය කියන සම්මාන හතරම ලැබෙනව. Mystery/ Thriller ගණයේ චිත්‍රපටයකට සාමාන්‍යයෙන් නොලැබෙන තරම් සාර්ථකත්වයක් Tell no one හිමි කරගන්නව. ඊට හේතු වෙන්නෙ හුදෙක්ම කුතුහලය උපරිම තලයකට අරගෙන ඒමට එහා ගිය ජීවන දර්ශනයක් මේ චිත්‍රපටයෙන් විවරණය වීම කියල මම හිතනව. ඔබ කෙනෙකුට ඇත්තටම ආදරෙයි නම් ඒ ආදරයේ නොසැලී ඉඳීම කියන ගුණාංගයෙ තියන වටිනාකම මේ චිත්‍රපටයෙන් පෙන්වා දෙනව. මොකද ආදරය කියන්නෙ හැමවෙලාවෙම මල් පෙතු ඇතිරුණ සුවපහසු මාවතක් නොවෙයි. තව කෙනෙකුට ආදරේ කරන්න පටන් ගන්නව කියන්නෙම අපි බාරගන්නෙ විශාල අභියෝගයක්. තමන් කරන ආදරයක් වෙනුවෙන් ජීවිතේ ඕනෑම අමාරුකමක් දරාගන්න පුලුවන්කම අපිට තියනවද කියන ප්‍රශ්නය අපිට අපෙන්ම අහගන්න චිත්‍රපටය අවසානෙ ඉඩ ඉතුරු කරනව. අනෙක් පැත්තෙන් ධනය සහ බලය නිසා දූෂිතව ගිය සමාජයෙ එක්තරා පැලැන්තියක් ගැන තරමක දේශපාලනිකත්වයට අනාවරණයක්  චිත්‍රපටයෙන් කරනව. අවසානය වෙනකම් උපරිම කුතුගලයකින් නරඹන්න පුලුවන් වගේම හදවතට දැනෙන සංවේදී කතාපුවතක් ඇතුළත් වෙන පරිපූර්ණ සිනමා අත්දැකීමක් ලබාගත හැකි චිත්‍රපටයක් විදිහට Tell no one හඳුන්වා දෙන්න කැමතියි.