ස්වර්ගයේ සිට වැටෙන කඳුළු - Tears in heaven

ඒ සිද්ධිය වෙන්නෙ 1991 මාර්තු මාසෙ 20 වෙනිද. එරික් ක්ලැප්ටන් ගේ බිරිද ලෝරි අවුරුදු හතරක් වයස පුංචි පුතා කොනර් එක්ක නිව් යෝක් නගරේ සුවිසාල නිවාස සංකීර්ණයක ලෝරි ගෙ මිතුරියක් වාසය කළ නවාතැනට එන්නෙ එදා තමයි. එරික් ක්ලැප්ටන් කියන්නෙ බටහිර රොක් සංගීතයේ දැවැන්තයෙක් වගේ ම එදා මෙදා තුර ලෝකෙ බිහිවුණ හොදම ගිටාර් වාදකයෙක්. ලෝරි ගෙ මිතුරිය වාසය කළේ නිවාස සංකීර්ණයේ 53 වෙනි තට්ටුවේ. යම් කටයුත්තකට පිටතට ගිහින් හිටපු එරික් එතැනදි ඔවුන් මුණගැහෙන්න නියමිත වෙලා තිබුණා. පුංචි කොනර් මග බලා හිටියෙ තාත්තගෙ අතේ එල්ලිල ඇවිදින්න යන්න. ඇත්තටම හැම කෙනෙක්ම හිටියෙ සතුටින්. නමුත් පොඩි වැරැද්දක් වෙලා තිබුණ. නවාතැන සුද්ද පවිත්‍ර කළ පිරිසිදු කිරීමේ සේවකයෙකුට කාමරයක තිබුණ විශාල ජනේලයක් වහන්න අමතක වෙලා තිබුණ. ඉතින් ඔය අතරේ ලෝරි නාන කාමරයට ගියේ දරුවා බලාගන්න ගැහැණියටත් ගෙදර වැඩ කරන සේවිකාවටත් දරුවා ගාවින් මොහොතක් වත් හෙල්ලෙන්න එපා කියමින්. නමුත් දගකාර  පුංචි කෝනර් හිටියේ නිවස පුරා ම දුවපනිමින්. විවර වෙලා තිබුණ ජනේලෙ ලගට ගිය කෝනර් ඉන් පහලට එබුනේ කවුරුත් හිතාගන්නත් කලින්. එකවරම සබරතාව ගිලිහි ගිය පොඩි දරුවා ජනේලෙන් එළියට වැටෙනව. ඔව් තට්ටු 53 කින්.!! කැල්ප්ටන් නවාතැනට එන්නෙ එදා හවස. සිද්දිය දැනගත්තට පස්සෙ ඔහුට වුණේ මොකක්ද කියල අමුතුවෙන් කියන්න ඕන නෑ. ඇත්තටම ඔහු එයින් දරුණු විදිහට කඩාවැටුණ. දරුවා ඉපදෙන්න කලින් තදින්ම මතට ඇබ්බැහිව සිටි එරික් ඒ දේවල් වලට තිත තියන්නෙ පුතා නිසාමයි. තම දරුවාට හොඳ පියෙක් වීම තමා ඔහුගේ සිහිනය වෙලා තිබුණෙ. ඉතින් ඒ බිඳ වැටීම සුලුපටු එකක් නෙමෙයි. ඒ කම්පනයෙන් ගොඩ එන්න ඔහුට සෑහෙන කාලයක් ගතවෙනව. සුව වීමේ කාලය අතරයි ක්ලැප්ටන් අතින් Tears in heaven ගීතය ලියවෙන්නෙ...

හදුනාගත හැකිද දවසක

ස්වර්ගයේදී දුටුවොත් මා ඔබ

Would you know my name

If I saw you in heaven

දැනේවිද මට මෙන් ඔබටද එය

ස්වර්ගයේදී හමුවුණොත් ඔබ මට

Would it be the same 

If I saw you in heaven

තවත් සවිමත්විය යුතුය මා

එලෙසින් පැවතිය යුතුය මා

I must be strong

and carry on

දැනසිටින බැවින් මම තවම 

අයිති නොවන බව ස්වර්ගයට

Cause I know I don't belong

here in heaven

කාලයට හැකිය ඔබ බිම හෙලනට

ඔබේ දෙපා අඩපණ කර

Time can bring you down

Time can bend your knees

කාලයට හැකිය බිද දමනට ඔබ හදවත

අනුකම්පා අයැද සිටියද ඔබ

අනුකම්පා අයැද සිටියද

Time can break your heart

Have you begging please

begging please..

සැනසුමක් ඇතිබව දනිමි

මේ දොරෙන් එපිට

Beyond the door

There's peace I'm sure

සැබවින්ම මම දනිමි එය

ස්වර්ගයේදී තවත් කදුලු නොහැලෙන බව

And I know there will be no more

tears in heaven..

***********************

2019 මාර්තු 30 එරික් ක්ලැප්ටන් තමන්ගෙ 74 වෙනි උපන්දිනය සමරනව. Wonderful tonight, Layla, While my guitar gently weeps, White room, Crossroads වගේ අමරණීය ගීත රාශියක් එරික් නිර්මාණය කර තියනව. Rock ගිටාර් වාදනයේ මගේ ලෝකයේ අංක 1 තමයි ඔහු. The Beatles කණ්ඩායම එක්ක ඔහු while my guitar ගීයේ solo කොටස වාදනය කරද්දි ගිටාරයෙන් නික්මෙන රොක් සංගීතෙ සැබෑ මිහිරියාව මම විඳිනව. ඒ වගේම crossroads ගීයේ solo වාදනය මෙතෙක් නිර්මාණය වුණු හොඳම rock solo වාදනයක් විදිහට හඳුන්වනව. අතැඟිලි තුඩින් විදුලි ගිටාරේ තත් පිරිමදින් ලෝකයක් රසවත් කරන මේ සුන්දර මිනිසාට සුබ උපන්දිනක් පතන්නෙ විශාල ආදරයකින්.