Midnight in Paris (2011)

හඳ එළිය ගලා හැලිලා සේන් ගඟේ රැළිත් එක්ක මුහුවෙන රෑ මැද්දේ පැරිසියෙ පටු වීදි දිගේ වීදි ලාම්පු එළි අතරේ අතීතයට ඇවිද යමුද.. හෙමිංග්වේ එක්ක වයින් බොමින් ස්කොට් ෆිට්ස්ජෙරාල්ඩ් එක්ක සාහිත්‍ය ගැන කතාබහක යෙදෙන්න පුලුවන් වේවි.. පිකාසෝ සිතුවමක් අඳින හැටි බලා ඉන්න ගමන් සැල්වදෝර් ඩාලි, ක්ලෝඩ් මොනේ, පෝල් ගොගෑන් එක්ක සිතුවම් කලාව ගැන සංවාදයක් පටන්ගන්න පුලුවන් වේවි.. නව කවිය ගැන ටී. එස් එලියට් ගේ අදහස් වලට ඇහුම්කන් දෙන්න පුලුවන් වේවි. ලේඛකයක් වෙන්න හීන දකින සිනමා පිටපත් රචක තරුණයෙකුට මේ වගේ අවස්ථාවක් ආයෙ ජීවිතේට ලැබෙන එකක් නෑ. ඒත් ඔහුගෙ පෙම්වතියටත් ඇගෙ දෙමව්පියන්ටත් මේක තනිකර පිස්සුවක්. මොකද ඔවුන් හැම දෙයක්ම මුදලින් මනින, තමන්ගෙ සමාජ තත්ත්වය පවත්වාගැනීම ගැන බොහොම බැරෑරුම් විදිහට කල්පනා කරන ගතානුගතික අදහස් කරපින්නාගත් අය නිසා. ඔවුන්ට දැනුම කියන්නෙ බෙල්ලෙ පලඳගෙන ඉන්න ආබරණයක්, තනතුරක්, සිවිල් බලයක් ඇතිකරවන දෙයකට එහා යමක් නෙමේ. ඉතින් අපේ මේ ලේඛක තරුණයාට සිද්දවෙනව ඔහු හොයාගත්ත මේ අපූරු මායාමය අතීතය හොයාගෙන හැම රෑකම පැරිසියේ තනිවම කරක්ගහන්න. පැරීසිය කියන්නෙ යුරෝපීය කලාවෙ අගනගරය. සමස්ත ලෝකයේම සාහිත්‍ය, සිතුවම් කලාව, කවිය, සිනමාව මේ හැම කලා මාධ්‍යකටම තීරණාත්මක බලපෑමක් කල තැන. Woody Allen මේ පැරීසියෙ සුන්දරත්වය ඒ සෞන්දර්ය ඉහළින්ම රැකගෙන කැමරාවට අහුකරගන්නව. Midnight in Paris ඒ තරම් Cinematography එකක්..සැකයක් නෑ මේ රූපරාමු දකින ඕනෑම කෙනෙක් පැරීසියේ හැබැහින්ම අතරමං වෙන්න ආසා කරන්න පටන් ගන්නව..ඉතිං අවසානෙ මේ නගරෙ පොද වැස්සක තෙමෙමින් ඇවිදින මිහිරියාව.. පියානෝ සංගීතයක චමත්කාරය විඳගන්න දන්න හදවත් දෙකක මුණ ගැහීමෙන් කෙළවර වීම කොයිතරම් අපූරු ද.. මේක හීනයක් ද නැත්නම් හැබෑවක් ද කියල අහන්න එපා.. ඒක තේරුමක් නෑ.. මේ හීනෙ අතරමං වෙන්න.. ගතහැකි දෙයක් තියනවනම් අරගෙන යන්න .. එපමණ යි...