කැරළිකාරී නුඹ
කැරළි කෙහෙරැළි නැතුවට
යාන්තම් හිනාවකටත්
නොපිට හැරවෙන
කෝළ රතු තොල් පෙති අගිස්සෙන්
පිනි හාදු වෙඩි උණ්ඩ වස්වන
කැරළිකාරී නුඹ
කැරළි කෙහෙරැළි නැතුවට
හදවතේ නගරේ
ස්නේහයේ මං මාවත් දිගේ
වීදි සටන් අවුලන..
ජීවිතේ ඔහේ
කාලයේ දිගු මාවතේ
ඇවිදිමින් සිතුලෙස
මග දෙපස
කෙටි තාප්ප පටු බිත්ති මත
ප්‍රේමේ විප්ලව කවි ගීත පබඳින..
ඉඟි බැළුම් මදහස් කැළුම් යට
සැඟවමින් රහස් පණිවුඩ
ඉඳ හිටක
මතකයේ සිතුවම් පටයක
ඇඳෙමින් රූ රටාවක
ඉසියුම් කඳුළු වායුවෙන්
මගෙ ඇස් කෙවෙණි බොඳ කරන.
තප්පරෙන් පංගුවක ඉඩ ගෙන
දේදුන්නේ හත් පාට මුහු කර
හීන ලෝකේ සිතිවිලි විමානේ
පුරා බිතුසිතුවම් අඳින...
කැරළිකාරී නුඹ
කැරළි කෙහෙරැළි නැතුවට
හදවතේ ඇතුළු නගර මැද
ආලයේ රොමාන්තිකම අරගල
සිදුකරන..
No comments:
Post a Comment