කූඩු කල කුරුල්ලාගේ ගීතය

I know why the caged bird sings

Poem by Maya Angelou

සැරිසරයි නිදහස් කුරුල්ලා

ආකාශ ගංගාවේ

හමා එන සුළං රළ මත හිඳ

නවතිමින් සුළඟ නවතින තැන් වල..

ගිලෙයි ඌ විදා අත්තටු 

රක්ත වර්ණ හිරු රැස් දහරේ

හිමිකම් කියයි ඒ කුරුල්ලා නොබියව

අනන්තය තෙක් විසිරි අහසට...

එනමුත් කූඩුවක සිරගත කළ

කුරුල්ලෙකු නොදකියි කිසිවක්

ඌ වෙසෙන පටු කූඩුවේ

රුදුරු යකඩ දඬු මිස..

විදාහල නොහැක උගෙ අත්තටු

යා නොහැක තබා පියවර..

එබැවින් ඒ කුරුල්ලා

විවර කරයි තම මුව 

ගයන්නට..

ගයයි ඌ බියමුසු හඬින්

පතනා යම් දෙයක් පිළිබඳ 

දෝංකාරය කරමින්

දුර අෑත කඳුකරය ද

ගයන්නේ කූඩු කළ කුරුල්ලා

නිදහසේ ගීතයයි..

සිතිවිලි සරයි නිදහස් කුරුල්ලෙකුගේ

සුසුම්ලන තුරු වියන පිස එන

නැවුම් මදනල දහර අතරේ..

හරිත පැහැ තණ බිමෙහි සැඟවුණ

මහත් කුරුමිණි සතුන් අතරේ.

තමන් සන්තක බවට කිව හැකි

නිමක් නාෙපෙනෙන අහස් ගැඹුරේ..

නමුත් කූඩු කල කුරුල්ලා 

නැගී සිටිනුයේ නිතරම

සිහින වළ දැමූ සොහොන්කොත් මතය

සෙවණැලි පවා උගේ

වියරු වී කෑගසන්නේ

බියකරු ස්වප්නයක හඬය..

විදාහල නොහැක උගෙ අත්තටු

යා නොහැක තබා පියවර..

එබැවින් ඒ කුරුල්ලා

විවර කරයි තම මුව 

ගයන්නට..

ගයයි ඌ බියමුසු හඬින්

පතනා යම් දෙයක් පිළිබඳ 

දෝංකාරය කරමින්

දුර අෑත කඳුකරය ද

ගයන්නේ කූඩු කළ කුරුල්ලා

නිදහසේ ගීතයයි..

.

.

Translated by Hashan Randika Dias