රවුම් හැඩපලු ගෙතී හැඩවුණ කොණ්ඩ ගස වුව දිග ඇතී
නිතර හීනෙන් දැවටි දැවටී හිතම අවසඟ වෙන හැටී
අවුල් වෙන මතකයන් ගුලිකර පීරුවත් හැඩ වෙන්නැතී
කොණ්ඩ ගසකද ලිහා ගනු බැරි කප්පරක් පැටලුම් ඇතී
හෙමින් සැරයෙන් හමන හුලඟට පවා කලබල වී ඉතා
ලැගුම් ගන්නට උරිස් තලයක සිහිල් පහසම පත පතා
ලතෙත් සිතුවිලි තෝර බේරා මතකයන් හිත ගොත ගොතා
කොණක් පාදා ගන්න බැරුවම දිගට ඇදි ඇදි යන කතා
මතක ඉමිහිරි සුවඳ මුහුකල විදාහල නුඹෙ කෙහෙරැළී
හිතග්ගිසේ ගැට ගැහීගෙන සිතුම් සුලඟක නැවි නැවී
අවුල් වී යන හැඟුම් පීරා හදාගෙන හිත යලි යලී
සොඳුර නුඹ වාගෙමයි නිතරම කරයි මගෙ හිත පැටලිලී
Thankuu!!!
ReplyDelete