නීරෝ සහ වීණාව

අධිරාජයෙනි 

බලනු මැන 

කවුලුවෙන් එපිට ලෝකය

ගිනිගෙන දැවීයයි

මුලු රෝම නගරය...

ඉතින් කිම

නොවෙති උන් ඔබ නෑසියෝ

මිතූරෝද අසල්වාසියෝ..

මන්දිර ප්රාකාරයෙන් මෙපිටය

ඒ සියල්ලෝ..

රස බොජුන් මධු සාද

අඩු නැතුව විඳින්නෝ..

වෙති ඔබේ නෑසියෝ..

නගරයේ පටුවීදිවල

බඩසයින් පෙලෙන්නෝ..

ජීවිතේ කටුක දුක

දිනපතා විඳින්නෝ..

තැලුනු හදවත් පතුල

ගින්දරෙන් දැවෙන්නෝ..

පියසි මත ඒ ගින්න

ඇවිලෙමින් නැසෙන්නෝ..

රජතුමනි..

මියුරු සත්සර නගන

වීණාව ඔබ අතය

සියුම් සත්සර බිඳී

නැගෙන නද කන්කලුය

මනකල්ය..

සවන්පත මී අමා

බිඳෙන් බිඳ විසුලාය..

නගරයේ ගිනි දැල්ල

ඇවිලේය ඇවිලේය

ඒ අතර

තවත් වෙණ තාලයක්

නිමවන්න හැකිවේය..

මුළු නුවර ගිනිදැල්ල වසාගෙන

අළුවන්න පෙරාතුව..